MI ROPUI REV. DR. ROHMINGLIANA KAN CHÂN TA

By: Tluanga Chhakchhuak

    TMEF founder leh Evangelist lâr tak Rev. Dr. Rohmingliana, kum 67 chu Aizawl-ah an nu (Pi Lalrinmuani Chin Affairs Minister atâna thlan tlin) nên an ti ti mawlh mawlh laiin a tlu thut a, Aizawl Civil Hospital panpui a nih hnuah stoke natna avângin tukin zîng 29.04.2021 dâr 10:25 AM khân ropuina ramah a Lalpa hnênah a châwl ta. 

(Vawiina kan sûn tâk TMEF founder Evan. Rohminglian pualin aw)

    Evan. Rohmingliana ruang chu vawiin 29.4.2021 tlâi dâr 5:30 pm vêl khân Keifang an thleng chho chauh a, Champhai hi zân dâr 1 emaw, dâr 2 vêlah an thleng chauh ang. Champhai TMEF ten police check gate-ah amah thlahna hun an hmang ang a, Tiau an tlang ang. Tiauah Hmunluah khua hoin an lo hmuak ang a, Hmunluah khua luhpui an tum a ni awm e. Hmunluahah hian in a sa a, a zo hman em kan hre lo va, tichuan, Tahan lam chu panpui a ni ang.

    A nupui Pi Lalrinmuani tân Kalaymyo sipai lal chu an biaksak a, lo hawng rawh se, kan man lovang an lo ti a ni âwm e. Pi Muani hi Tahan thlengin a kal tlang dâwn em tih kan la hre thei lo. 

    Tualchher Evangelist leh tualchher theology puang chhuaktu tia amah er ṭhînten an sawi ṭhîn hi Mizo Philosopher ropui tak leh Theologian kum 2000 hnu lama Mizote zînga kan neih ropui ber a ni. A remchan hunah a theology a ril êm avânga Sâp ram aṭanga an rawn belchianna te, Zohnahthlâk ṭawng hrang hrangte chu zir hranpa lem lova an ṭawngkauchheh, ṭawng upa thleng thlenga thiamtîr a, Lalpain a thu ropui puanchhuah nâna talent a pêk chanchin te leh chawimawina Doctorate Degree an hlân dân thlengin kan la sawi leh dâwn a nia.

    Rev. Dr. Rohmingliana hi ka hriat chian êm êm, kan chhûngkaw ṭhian a ni a, a thiannu Pi Lalrinmuani pawh Mandalay khawpuia Staff Nurse a rawn training aṭang tawhin kan lo in hmêl hriat tawh a, rualkawm thiam tak chhûngkua an ni a, an rawngbâwlna avângin an ina lût chhuak leh mikhual inlêng an nei reng ṭhîn a, hlimhmêl takin mite a biak ṭhîn avângin mi ngainat a hlawh hle mai.

    Pu Rohmingliana ka hmêlhriat ṭan tirh hun hi Maymyo khuaa 1986 vêla Mizo Christian Convention kan hman ṭan tirh lai vêl kha a ni. Mi piangthar ṭha tak a ni a, thusawi thiam a nih avângin kohhranten speaker atân kan hmang a, Kâwlphai Mizo speaker zîngah chuan mi rawih hlawh ber a ni. Keipawh Maymyo khua a camping buatsaih chu ka lût ve a, a lehkhabu ziah leh a sermon cassette leh CD ka nei teuh mai.

    TEF (the Truth Evangelical Fellowship) hi Myanmar-a a din hnuin 1992 khân Mizoramah an rawn tla thla a, Champhai lamah rawng a bâwl ṭan a ni. Biak in hrang hrangah thu sawina hun an pe a, zau zawka rawngbâwlna a neih theih nân mual inkhâwm te buatsaihin hmun dang dangah campaign-te buatsaihin a rawngbâwlna mipui zîngah a nung hle mai. Camping a buatsaih hian amah anga nung taka thu sawi thei evangelist dang puibawmtu a nei ṭhîn. 

    Champhai aṭangin Aizawl lamah pawh rawngbâwlna a chhunzawm zêl a, camping chhawng tam tak a nei zui leh bawk. Tichuan, Truth Evangelical Fellowship (TEF) chu the Truth Mission Evangelical Fellowship (TMEF) tiin an inpâwlhona chu1998-ah hming thlâk a ni. TMEF tia hming an thlâk hnuin an pâwl hi THUTAK HO tiin Zoram khawvêlah a rawn lâr chho ta zêl a ni.

    Kohhran anga enrollment an siam lem loh vângin member zât chiah hriat theih ni lo mah se, an rawngbâwlna a alh that vânglai chuan TMEF hnungzuite hi nuai khat hial a tling mai thei. Hmun hrang hrangah Camping centre an nei a. Champhai, Selesih, Serchhip, Hnahthial leh hmun dang dangah hian camping centre neiin hun bîkah Chanchin Ṭha Ruaipui an buatsaih thin a ni.

    Myanmar, India, Bangladesh leh khawthlang ram tam takah TMEF branch an nei a, chanchin inhrilh tawna neiin an phur thei hle. Kum tin deuhthawin TMEF International Ruaipui hi Pu Rohmingliana ten an huaihawt thin a, kal an ṭhahnem ṭhîn hle mai.

    Evan. Rohmingliana thusawite hi han ngaithla chiang ila, Chinese pastor lâr Watchman Nee-a leh khawvêl thuhriltu lâr London khawpui chhuak Rev. John Wesley-a zirtîrna hi a tam thei hle mai. John Wesley sermon hi a sawi chhawng thiam hle a, a chhan chu amah hi Upper Burma Methodist kohhran member lo ni tawh, preacher hial a lo zir chhuak tawh a ni. John Wesley-a theology leh Methodism a chhumhmin a ni.

    Evan. Rohmingliana chuan mihring hi chhe lailet der, ṭhatna eng mah nei lo, thil ṭha ti thei lo, thil ṭha a tih ve chhûn pawh Pathianin a hnâwl hnu sual mizia aṭanga chhuak tho a nih avângin eng mah a ni lo a ti ṭhîn.

    Evan. Rohmingliana zirtîrna hi pâwn lama a lan an ang ngawt chu a ni hauh lo. Mi ṭhenkhat ngaih dân anga ‘tualchher evangelist’ tih ngawt chi pawh an ni lo. A theology hi a ril êm êm a, Systematic Theology huang chhunga mi a ni pha daih. Systematic Theology chu theology huang chhûnga eng subject emaw a bîk taka zirchianna a ni. Eg. Vântirhkoh chungchâng zir bîkna chu Angelogy, hun hnuhnûng zirna chu eschatology, chutiang bawkin chhandamna chungchâng zirna pawh soteriology. 

    Evan Rohmingliana thusawi chhandamna ring thei kan ni lo tih te, Pathian thu hi tuman kan awih thei tak tak lo tih te, mihring hian eng mah tih theih a nei lo tih te hi Pathian thu zir ten an hriat chian êm êm kohhran siam that hnua Reformed Theology /Calvinism thurin aṭanga an lak a ni daih. 

    Calvinism zirtîrna zînga thu pawimawh tam tak hi Evan. Rohmingliana zirtîrna thu laimu chu a ni. A zirtîrna Calvinism thulaimute hi amah a hnungzuituten a thih hnu daiha an duan chhuah a ni. Calvin-a ngaih dân chiah chiah ni vek kher lo mah se, Evan. Rohminglianan a irawm chhuakin Zo ṭawngin a sawi fiah thiam êm êm a ni.

Print this post