By: Tluanga Chhakchhuak
2021 Myanmar General Election 2020 November Ni 8 a neih zawh tâk hi a fel fai a ni tiin Asian Network for Free Elections" (ANFREL) Bangkok chuan nimin 17.5.2021 khân a puang chhuak a ni. Vote tihchingpen a awm tia Political party pawh ni hlei lo Myanmar sipaiten finfiahna pawh awm lova inpuhna hi belh chian a dawl lo hrim hrim tiin a puang bawk.
Mipui sorkâr thuneihna pâwng chhuhsaktu sipai firfiakten inthlanpui neih hma aṭangin an thlâwp party tenau 32 lai an ko khâwm a, inthlanpui result puan huna an party ṭangrual ho hnehna an chan loh huna tih dân tûr an lo sawi ho diam tawh a ti.
Asian Network for Free Elections" (ANFREL) chuan November thla ni 8 inthlanpui result hi Myanmar mipui democracy duhtute rilru leh tih tak zeta thinlung chhûngril taka duhthlanna rah chhuah liau liau a ni tiin Mynmar General Election an zirchianna report hnuhnûng ber Video Conferencing meeting an neih takah khân an târ lang a ni.
NLD party hi inthlanna chu a siruk lain vote a hmu sâng ber a, sorkâr term hlui zawh hun Financial year ending an hman zawh hmain Febuary ni 1 khân MP leh MLA te chu hrêngin sipai thuneihna ruichilhten sorkârna a pâwng chhuhsak lui ta a ni.
Inthlan result chungchânga lungawi lohna complaint belhchian dawl lo a rualin ram chhûng hmun tinah thuziak inang thlapa an theh luh dân aṭangin ruahmana awmsa an rawn chêt chhuahpui a ni tih a chiang hle a, kumtling lo leh mitthi hminga vote rawn thlâk an sawi anga tam lutuk lo kal chu an party mi leh sa polling boot-a duty-te pawhin chiang taka hriat ve awm tak a ni lai a, a hnua chhuichian hnua chu inpuhna chu dik lo tih finfiah a ni.
Asian Network for Free Elections" (ANFREL) chuan Inthlanpui thlithlai tûrin expert 24 leh an team-te chu hmun tinah an tîr chhuak a. Myanmar ram puma inthlanna neih zawh tak hi remna leh muanna awmin fel fai leh dik taka neih a ni a, inthlanna tibuai thei thil khawi hmunah mah a thleng lo tiin a târ lang bawk a. Covid hri lêng laka invenna lama sorkâr inkaihhruaina zawm chungin election compaign neih a nih vângin ṭum dang angin mi an pung khâwm thei lo tiin report-ah a târ lang a ni.
No comments:
Post a Comment
I ngaih dân han thawh ve rawh le....