HISTORY-A CHUANG RENG TAWH TÛR BATTLE OF MINDAT

By: Tluanga Chhakchhuak

Nimin tlai 14.5.2021aṭangin mipui vênghimtu pâwl PDF-ten Mindat mipuite chu Trench Khur nei ṭheuh tûrin leh a ṭûl hunah khur chhûnga tawm tlat tûrin hmanhmawh takin a hriattîr a, tlai thim dâwn thlengin trench khur an lai sup sup mai.

Nimin khân sipaiten Midat khua hi 2008 Myanmar Constitution dân Section 419-na tlawh chhanin Martial law a puang a, Mindat mipuite erawh chuan mipuite hi eng sipai rorêlna hnuaiah mah kan awm lova mipui rorêlna hnuah chauh kan awm ni an ti. 2008 Constitution dân chhe tak hi sual sipaite ngeiin an bawhchhia a, mipui sorkâr NUG leh CRPH ten kan hluihhlawn tawh a ni an ti.

Ni 13.5.2021 Martial law an puan hnu aṭangin Military council sipaite chuan beipui thlâkin Mindat khua chu indona râlthuam hmanrua hrang hrang hmangin a bei ṭan a, nimin ni 14 khân Helicopter 2 chu vawihnih ṭumin an sipai hliamte an rawn ṭhiar chhuak a ni.

Mindat khua People Defence Force leh Military council Sorkâr chuan inbiak rem tumin ni 10 lai inkahhai puang tawh chu an ni a. An inrem theih tak loh vângin mipui lam PDF leh sual sipaite chu an han inkhuainuai ṭha leh ṭan ta chu a ni a. Indona an han ṭan phat chu sipaiten laipui (Howitzer Cannon) hmangin an khaw thenawm Km. 33 a hla Kyauh-Thuh khua aṭangin an rawn râlkhat bei ṭan ta a ni. Laipui puak ri chu a ring khawp mai a, Mindat chhevêl khua aṭang pawhin a puakri khawk ri rum rum chu an hre thei a, mipui awmna lam hawiin an rawn râlsai chhiam a ni.

Ni 13 zîng dâr 6 emaw chauh a la ni si a, Mindat PDF hnam sipaiho chu an bul hnaiteah sual sipai an awm loh avângin an inthlahdah pawh a ni mai thei a, an lo inralrin hman loh lai takin khawpui ri ni awm tak hi boruakah a rawn riin a rawn kui vawng vawng hi a lo ni a, an hriat rual rualin a rawn puah zui ta mai a, a hmunah PDF hnam sipa pakhat chu ka pawh chhawn lovin a thi nghâl a ni. Mi dang 5 chu laipui mu per chhuakin deng fuhin hliam an tuar ta a ni.

A hma ni chiah pawh khân Mindat khawchhak lam "Pakhokku" khua aṭangin Military Council sipai convoy motor 5 rawn chho chu an khawdai km. 3 vêl chauh a hla a rawn thlen khân laiphir leh ulhbun hmangin hnam sipai PDF-ten an lo lambun bawk a, tawkfang an inkah hnuah an motor-te chu tlângram kawng zimte a nih vangin awlsam takin an lêt leh mai thei lo va, an sahimna zawngin an tlânchhiatsan ta hlawm a, râlthuam dang leh ei tûrte chu an laksak hnuah Mindat PDF-ten an hal chhiatsak vek mai.

Chin State hmâr lam khawpui tlângchhip feel 4000 chuang sânga awm Mindat khuaah hian tûn kâr Thawhṭan ni (10.5.2021) khân tualchhûng mi Peoples Defence Force leh Sual sipaiho inkârah inkahna a thleng tawh bawk a, sipai firfiak 13 chu kah hlum an ni. Hei hi April ni 24 a PDF leh sipaite Mindat khawpui daia inkahna awmah sipaite an chêt chhiat avângin phai aṭanga sipai lam puitu (reinforce security) rawn kalte an lambunna a thi an ni.

Tichuan, ni 11.5.2021(Tuesday) pawh khân PDF ten sipai Truck 9 rawn chho leh chu Mindat kawt chhuahah lo dangin hmun 2 lai ah inkahna a thleng leh a ni. Sipai Truck-te chu eng emaw zât an kang chhia a, sipai 7 thi lehin eng emaw zât an hliam belh ta a. Civil lam PDF erawh thi leh hliam report hriat tûr a awm lo.

Mindat PDF-te chu râlthuam ṭha pawh nei lovin sa pêl nâna an hman ṭhîn Zopa tualchher silai leh laiphir hi an neih ṭhat ber a ni a, bomb siam chawp sangha man nân leh lung hal nâna an hman ṭhîn Geletine an hmang a ni. Sipai lam aṭanga dawt hlir puang ṭhîn MWD leh MRTV chuan an tih dang pângngaiin sipai 1 chauh thi angin leh 3 hliam awmin an puan leh tawh kha.

MINDAT mipuite chuan lungawilohna lantîr vânga sipaiten an hrên khawtual mi 5 chhuah tûr an tiam an chhuah loh vânga inkâp ta chiam an ni. Vawiin chawhnu dâr 2 vêl khân Sipai hmunpui Naypyidaw aṭangin Helicopter 2 chu Midat-ah vawi hnih a rawn tum a, Pakhukku khua lamah a pan leh bawk a, sipai mamawh thil rawn dah pahin sipai hliam tuarte a rawn phur nia hriat a ni.

Mindat khawchhak lamah police station awmin ṭanhmun an khuar a, a thlang lama No.274 Light Infantry Battalion sipaiten Civil sipai PDF-te chu kârchehin an bei chiam bawk a, Sipaiho hman automatic rifle leh Mizopa tualchher silai inbeihna hi khawvêla indona ngaihnawm ber pâwl a tling thei ang. Sipai ṭhenkhat hian sniper silai hmangin hmun tinah an chang reng a, mipui zîngah pawh hliam tuarte an awm ve bawk a, an ni buaipui tûr leh PDF sipai te ei in pe tûr pawhin chêt sawn a harsa riau mai.

Mindat (EPC) office a Power House enkawltu Assistant Engineer Pu Wai Phyo-a chu sniper-te silaimu tuarin vawiin chhûn dâr 2 vêl khân a thi tih thu dawn a ni.

Print this post