By: Tka Zote Thankhuma
SHINO - MYANMAR GAS PIPELINE ROPUI.
Kan chhiar fo tawh ṭhîn angin, China ram hi ram zaupui mai leh mihring pawh mtd 1500 dâwn lai khawsakna ram a ni a, an ramah khian ni tin Oil barrels 3,775,000 an siak chhuak char char a; mahse, indaihlo hen hen tak an ni. Kum eng nge maw zât liamta ah khân Foreign policy puitham zet mai an dung chhuak rup mai a, heta an budget hi US dlrs trillion 2 a tling an ti, chu chu, tld hlir 2000 tihna a ni, a tam tham lutuk. Hêng pawisa zozai hi khawvêl sorkar rethei zâwk te hnênah Rel kawng sial nân, Thlawhna tumhmun siam nân Motor Kawngpui siam nân leh Lawng chawlh hmun din nân te, an han puktir ta chur chur mai a, sorkar rethei sum mamawh tak tak an lo tam ropui mai si a, an puk ta sup sup mai a ni.
Mahse an in thenawm Saum puktir satliah ngawt lo va, intiamkamna tah tawktak nên a ni an inpuktir hlawm ni, ram retheiah chuan hna lian tham tak han thawk thei an lo awm mûmal ngai si lo, an mahni China bawkin contract hna an han thawk zui nghâl a, tam tak an han hlep sak leh a, chu mai bâkah hun tiam chhûngin an rul leh thei hlawm hlawm bawk si lo, kum chuti zât atân tiin Lawng chawlh hmun pawimawh tak takte chu an neihsak a, duh leh an leiba rulh nân Pawisa a puk belh tîr a, rulh a harsa tawlh tawlh a, "China Leiba Thang" ah an awk nghet ta tawlh a, an duh dân hawi zawngin Inremna a siampui zui tawh mai ṭhîn, "China Uite" kan tih tak ang chi an lo tam ta êm êm mai a ni.
A tawi zawngin sawi ta ila, China Foreign policy chu a fuh ta lutuk a, an lo hausa ta phut phut mai a, chutih rualin an tualchhûng ni tin mamawh hmanral pawh a lo pung chho lo thei bîk lo, kum kalta 2020 ah te kha chuan an ni tin Oil hmanral pawh pui tham hem hem tak a ni tawh. An ram khawpui lian ber pawh nilo, mihring mtd 19 awmna Beijing khawpui ah ringawt khian ni tin Car thar 5000 a awm belh zar zar niin an sawi, chutiang anih vang chuan an ni tin Oil mamawh pawh a tamin a hautak tham êm êm mai a. Shanghai, mihring mtd 23.4 awmna te, Tianjin, mtd 13. Shenzen, mtd 12.7. Giangzhou, mtd 12. Chêngdu, mtd 10.2. Chongqing, mtd 9 awmna bâkah mihring maktaduai 5 chunglam awmna khawpui ringawt pawh a tam lutuk tlat, hetiang anih avâng hian Motor Car leh lirthei chi hrang hrang bâkah industries lama an hman ral khi ni tin barrels vbch 1.35 (13,500,000 ) a tling daih, an mahni tharchhuah ni tin Barrels 3,750,000 hi a tam thawkhat viau naa indaih ngaihna a awm lo. Middle East ram aṭangin ni tin Barrels maktaduai tel in a lei char char a, Oil man bâkah a phurh man nên a hautak ve khawp ang.
Kum Ad 2000 August thla lamah khân Daewoo company leh Burma sipai sorkar te chuan Bengal tuipui Arakan vaukam vêla Oil leh Natûral gas zawnchhuah chungchângah Inremna an siam a. Arakan vaukam hnaih Tuipui ah te chuan Oil leh Gas a lo tam râpthlâk lutuk mai a lo ni, "Shwe Natûral Gas Project, Bay of Bengal" tih ani a, China chu a inrawlh rang kher mai, 2004 ah " China National Petroleum Corporation nên kum 30 chung atân Oil leh Gas inleisak dân tûr Inremna an ziak nghâl a, China sorkar an han che ta tak tak mai a, Pipe hrawl pui pui Motor Car tlanluh zar zar theihna hial tûr khawpa lian hlir an rawn thiar lut ta tluk tluk mai a, Pipe leh a phumna vêl senso atân pawh US dlrs tld 2.54 dâwn lai chu an han theh chhuak nghâl a, Pipe pahnih Crude Oil leh Gas pipe kal kawp tûr a ni a, a hautak na ngiang mai. Mahse China tân chuan Pheichham man tluk hialin a vânneihthlâk ta ve ang. Middle East oil an lei ṭhîn tam tak a su hek hlawk thei dâwn a ni.
Oil pipe bîk hi km 770 zeta thui a ni a, Sittwe ( Akyap) bul thliarkâr pakhat Kyaukphiu aṭangin Magwe bulah Mandalay leh Kyaukse inkârah a chho zêlin Shan state Lashoe-ah Burma ram vangtan zawngin a tan tlang chho ruah mai a China ram Yunan province khawpui Kunming-ah an lo sawngbawl dâwn a ni, He Oil pipe lian hian ni tin Oil thlitfim loh barrels 240,000 China ramah a pump lût zur zur dâwn a ni,
He Crude Oil pipe hrulah zêlhian China mipuiten an mamawh ngawih ngawih Gas pipe kaltir a ni bawk a, he Gas pipe phei hi chu a sei tham ngei mai Burma ram chhûngah ringawt pawh km 770 a thui a nih bâkah China ramah thui tak an phum tlang zui mai a, km 2806 lai a tling, Kunming aṭangin Nanning-ah a chho a, Guigang lamah a chho daih, he pipe hian kumtin Gas Cubic mtr tld 12 a Pump lut hem hem mai a ni, cubic mtr 12,000,000,000 hi Mizorama kan hman ṭhin Gas burah hian thun dâwn ta ila Bur tld 1.5 (1,500,000,000) kan thun khat vek thei ang. Hetiang hian Bengal tuipui Arakan vaukamah hian Oil namên lova tam leh Gas Cubic mtr Trillion 9 ( tld sang kua) siak chhuah tûr la awm in an hria ani. Thil mak deuh mai chu hêng gas pipe kalkawng hian mimal In, Ram, Huan, Leilet tam tak a tichhia a, mahse a tuartute hnenah compensation chhe te pawh pêk an ni lo, chu ai maha la lungchâhiathlâk zawk chu, hetiang khawpa Oil leh Gas ngah êm êm chung si hian a ram mipuiten hnianghnar taka hman tûr an nei ta chuang lo chu a ni.
Lawng lian, Oil Tanker emaw, Rel hmang emaw a phurh ngai miah lo China Oil pipe ropui tak mai hian tûnah hna a thawk char char tawh a, hêng crude Oil kan tih ho rêng rêng hi hmanna a tam êm êm mai a, Petrol, Gas, Diesel, Jet fuel, leh Oil chi hrang hrang bâkah Alkatra leh Plastic thlengin an siam chhuak a. Hêng hi Ram mipui leh thenawm ram hnenah te hlep neiin an hralh leh a, hlâwkna hlir a ni mai. Hêng hi India hian a hre ve kar mai si a, chawkluh ve a tum ta a ni. Burma ramah eng mi pawh sorkarin tu pawhin ro rêl mah se a thlawp zar zar a ngai tlat. Kaladân Luipui chhuah Sittwe aṭangin lui kuang an rawn zauh chho anga Lawnglian thlen phak chin aṭangin Mizoram chu km 50 lek a ni tawh, vbch sang tam tak sengin tûnah hian an bei mêk a nih hi.
Tûnlai hian Burma ram chu nasa takin a buai mêk a, ( alo buai chhoh tak dân kan chhiar fo tawh awm e ) China hlauh thawn ber chu hêng an Oil lakluhna Pipe ho hi a ni, tunah hian Chinese Army te chuan civil dress inbel in hêng Oil pipelines te hi an enkawl mek a, Burma ram hi hun rei tak UNO leh khawthlang sorkar te hrekbeh in an awma, an rethei rei hle, Tuna Sipai sorkar phuah chawp China in a thlawp tlat chhan pawh hêng Pipelines vang hi ani. Hêng Pipelines te hi himdam taka an awm hi China chuan a ngaih pawimawh ber ani a, a tul anih chuan hêng pipe chhuanlam hian in sipai chakna pawh China hian a hmang duh hial ang.
SYRIA leh BURMA.
Khawi ramah pawh niraw sek sek, eng party pawh sorkar se, mi mal lalna ( dictator) pawh nise duhlo tu emaw duhlo pâwl emaw an awm ngei ngei, mi tupawhin an theih phawt chuan LAL nih hi antum veka an inthik tawn vek bawk. Mi thenkhat ten tuna Burma buaina leh Syria buaina hi an tehkhinin, Burma mipuite tan beisei tûr awm lo hial in ansawi ṭhin 1963 kum khân Syria president Nazim Al Qudsi chu, tuna Syria president Basar Al Assada pa, Hafez Al Assad leh a thianten an paihthla a, chuta tang chuan mûmal lo zet in president an inthlâk chho zurzuta 1971 ah Hafez al Assad chu president a rawn ni ta a, 2000 kumah a thi a, a fapa Bashar Al Assad hian a rawn thlâk ta a ni.
A tawi zawngin sawi ta ila. Syria mi dik tak tam zawk khuan an thlawp tlat a, amah duhlo tu ten tharum hmanga paih thlâk an tum ta a, chumi denchhen chuan hnam tanau zawk ten inlak hran tumin hma anla nghâl sup sup a, Autonomous Administration of North and East Syria tih te, Interim Government (Syrian opposition) leh Kurdistan Democratic Party tihte an tam lutuk ISIS leh Alqaida ten kua anlo hreuh ve char char bawka thenawm Arab ram ten anduh duh an thlawp kaw kalh neknuk bawka Civil War rapthlâk zet mai a chhuak ta ani, an buai dân khu buai hneh tak an ni, mahse Sorkar fawng chelhtu ber Bashar Al Assad hi Syria mi dik tak tam zawk in an thlawp tlat a, an paih hlei theilo a ni bermai. Mipuiin an thlawp phawt chuan sorkar paihthlâk hi thil harsa a ni lo, China Veitnam, Cambodia, leh Russian revolution, France revolution, bâkah tunhnai thil thleng Libya, Irag, Afghanistan, rama thil thleng te pawh hi mipui thlawpna tello chuan thil tih theihloh tawp chi a ni. Syria bikah hi chuan Sorkar dinglai Bashar Al Assad hi Russia leh Iran hian an thlawpa a bak hel pâwl tam tak hian an beih rawn ani ber mai. Mithi pawh antam tawh khawp mai, 388,652 a tanga 594,000 vêl an boral tawha he buaina denchhen hian Europe leh khawthlang rama pemlut chak tak tak 7,600,000 zet ten raltlan angin Syria ram hi an chhuahsan tawh bawk. Mipui in an thlawp phawt chuan tih theihloh a awm ngailo, Burma pawh hi mipui an tanrual tlat chuan Sipai lam chu an tlawm thuai mai ang.
CRIMEA - RUSSIA.
History kan chhiar chuan Crimean War hi a lar hle, a chhan pakhat chu international Red Cross lo chhuahna bul Nurse pakhat Florence Nightingale chanchin vang hian a ni. Kha indona kha 16 october 1853 - 30 march 1856 a thil thleng kha a ni a, an Indo chhan tak kha ka chiang chiah lo na a, Christian ten an dikna chanvo humhalh an tum vang te pawh a ni awm e. Russia Greece leh tûnlaia Syrian buaina a in hnamhnawih nasa tak Kurdish helho an tangrual a, leh lamah Tûrkey, Egypt, France British, Sardinia te an tang bawk a, Russia lam hi 530,000 an thih hnuah an tlâwm a, British lam pawh 225,320 zet an thi vebawk.
1917 Russian Revolution lai khân White Russian (Communist nilo lal lam tang ho) hmun pui a ni ṭhin, mahse 1920 ah Gen. Wrangel leh a sipai rualte chu hneh an ni a, White Russian Army 50000 lai chu communist-ho hian an khaihlum vek a ni. Kum 1921-ah the Crimean Autonomous Soviet Socialist Republic (Autonomus ni si USSR ram bung khat) ah siam a ni a, mahse 1945, thiah leh niin Crimea ram chu USSR ah tlu lût tak tak ta a. 1954 atang phei chuan Ukrainian ram chawp in USSR hnuaia state Pakhat Ukrainian SSR (Ukrainian Soveit Socialist Republic) a ni ta, 1991 USSR a keh darh khân Ukrein ram chu Independent alo ni a, Creamia ram pawh Autonomous Republic of Crimea Ukraine ram bung khat a rawn ni veleh ta a ni. Creamia ram khawchhak lamah hian Russian an tam êm êm a, hel pâwl hrang hrangin independent emaw Russian rama beh emaw tumin buaina an siam reng a, 2014 khân Russia hian sipai rual tîr lûtin helho chu a pui ta thut mai a, Creamia khawchhak lam chu Russia ramah a lo bet ta a, mipui ngaih dân lak a nih hnuah Russia ram a dik tak anga chhal a ni zui ta a ni. Kum 2016 ah phei chuan Russian legislative election ah hial an lo tel ta a.
Hei hi Amerika leh a lamtang NATO ramte bâkah EU lamin an duh lo êm êm mai a, thapui thawha han la lêt leh tûrin a chhûnga chêng Russia ṭawng hmangten an duh zawk tlat bawk si a, Ukraine sorkar a lungawi thei ngang lo va, Russia nên an inkârah buaina a chhuak ta a ni. Hman deuh khân Russia hian ramri lamah sipai a chhek lût leh a, EU, NATO leh US ten an bauh rawn nasa mai. Russia hian thu rum tak tak a chhak chhuak zui na a, indo tak tak han hma chhawn tûr chuan an sumpai dinhmun a ṭha bik vak lo, Russia sipaite hi an inhnukdawk leh thuai mai.
MIDDLE EAST
Ṭawng tam lutuk hi a pawi viau thei, Sadam Hussain kha pa sehhel leh rorum zet mai hi a ni ve a. Arab tangrualten Israel ram te reuh te an han do rawn vaka an hneh thei der lo mai kha a lo la na zual fal bik êm êm mai a. Egypt president Anwar Sadad-an Israel sorkar Inremna a han siampui te khân, a ṭhinrim lutuk a hachang a lo thial rawt rawt mai a ni.
Israel hneh theih dân awmchun chu Atom Bom neih kha niin a hria a, Atom bomb neih sauh sauha Israel vaubeh tlat mai kha a duhthusam a ni Nuclear Reactor nei tûr khân Sorkar hrang hrang an han dawr kuala a tawpah France ram hnenah Oil dlrs mtd tam tak man tawktarh in Commercial reactor a lei thei dâwn ta a ni, Electric Power siam nan liau liau a ni e ti chung si khân Atom Bomb siam ngei kha a tumruh nasa mai a. France Sorkar chuan Nuclear Reactor changtlung zet mai a rawn bun sak ta ruau mai a. Sadam Hussain phur phêng chuan, "press conference te ko in, Arab ho zawng an nep e mai Thlaler ah sanghawngsei rual nên an inzui duah duah ringawta Israel sorkar te tak te pawh an hneh thei silo" an ti ṭhin, lo ngai reng rawh u, Iraq hi an lo va ropui em, Atom Bomb hial an neih tak hi an la ti dâwn" tiin Chapo takin a sawi chhuak ta a, a chang leh "Iraq in Nuclear bom kan neih hun chuan Zionist ho kan bom phirsi vek ang " tih ang reng kha a cheh zing ta lutuk a, Israel Airforce Pilot rual an vinglut ta a. Iraq Nuclear reactor te chu le minutes rei lo tê chhûngin an han bom darh vek mai a, Saddam Hussain hrilh hai lutuk chuan mawh puh tûr a han zawng chiam ṭhîn tak naa a sawt tawh chuang si lo. Ngawi reng khân Atom Bomb kha siam mial mial mai se chu a that zawk hmêl viau a ni. Ṭawng hnem lutuk hi a pawi thei viau a ni.
ISRAEL - IRAN.
Israel leh Iran te pawh hi tûnlai khawvêl sorkar inhal berte zînga chhiar tel ngei ngei chi an nih hmel, 1950 hma lamah kha chuan ram inhal lemlo tak an ni maw le, 1979 Iran revolution atang khân an inhaw zual ta êm êm mai a ni.
Anni pawh hian Nuclear bomb neih ngei tumin hma an la char char a, US President Barak Obama hunlai khân Amerika leh sorkar lian paruk ten, Civil Nuclear Reactor chungchângah Inremna siam puiin sum tam takin an pui nghâl bawk a. Iran hruaitute chuan, "Zionist ho tân vânpui a chim ta" tih angreng Israel tâna hriat nuamlo tak tak in tawng ancheh zui vak vaka, hêng hi Israel chuan a pawm zam theilo hle, "Nuclear Bomb zawng in nei lek lovang" tiin an insehruh ngal ngal mai a ni, Isrsel tan rumrut tu, Donald Trump arawn president khân he Inremna atang hian a in hnukdawk daih nghe nghe a ni. Mossad lamin an report dân chuan Atom Bomb siam tumin hma an la ngei tih hriat ani bawk si, nikum lawk khân Iran Nuclear sawngbawlna hmun leihnuai thuk lutuka anbun chu a chhan hriat siloh hian a kang thut mai a, Iran hruaitute chuan Israel enthlatu pâwl zinga mi, Mossad ho thiltih ni ngei hian an hria a, han finfiah ngaihna an hre der bawk si lo, an scientists thenkhat lah an lo kang hlum tel rawl nen, an ṭhinrim lutuk an insawh nghawng nghawng ringawt mai a ni.
Amerika ramah Inthlanpui a lo awm a, mi sawngnawi zet mai, Joe Biden chu rinhlelh awm tak mai hian thlantlin a ni a, Khawvêl ram hrang hrangah hel pâwl hrang hrang an rawn pawng pawrh nghâl a, Syria leh ram hrang hrang ah ISiS an rawn inlar thar leh a, China leh Russia an inluling zual sauh bawk a, Iran Nuclear deal chungchâng pawh Joe Biden hian a rawn tharthawh leh a, mahse, Hmanni lawk tak tak khân Iran Nuclear Reactor uluk lutuka an ven thuahthip chuat mai chu, a chhan hriat siloh hian a kang puak darh leh nasa mai, tûn tumah phei chuan Uranium thlitfimna hmun tûr, a hma ni lawka Iran ram hotu lawk in intithei taka a hawn thar hlawl kha a ni a, siam that leh huphurhawm zet hian a kang vap hem huam mai a, Inran chuan "electric kalsual vang a ni e", an han ti phawt a, a hnuah Mossad ho bawk an mawhpuh leh ta tho mai, Israel lah chu an ngawi chip hmiah mai si, an ṭhinrim lutuk phuba lak ngei intiam in an inhrosa kuk kuk ri ngawt mai a ni.
A hnu deuhah Syria ramchhung Iran sipai ho hmun pui atangin Roket a rawn thlawkchhuak a, Negev thlaler a, Israel Nuclear hmunpui bom chhiat tum niawm tak hian a rawn pan ding ve vuah vuah a, mahse an rawn kap fuh lo nasa mai, sawtah sawtah daih a va Kawrṭhindeng rah tlak ve ta mai mai a, mahse kut thlawn tuar duh miah lo, Israel Fighter rual an ving chhuak ve thung a. Syria rama Iran ho hmun pui an va suasam tak tak mai a, hneh rem rem tak an ni.
Atom bomb neih an duh a nih pawhin ngawi rengin buaipui ta mai se, a tha nimai tûr, ṭawng hnem lutuk hi a pawi leh tlat ṭhîn.
IDI AMIN.
Idi Amin, Uganda president 1971 - 1979, pui roh kha, pa tumlum mawl ve tak, ziak leh chhiar thiam map lo a ni, amah kha pa lian leh sek zet mai hrisel hmel deuh anga lang si khân a ruka Tha na benvawn nei, a khat tawka a tha na chhuah chang nei a ni a, indopui ll na hunlai vêl khân British sipai ah atang ṭhin a, Boxing lama a chet that deuh vang kha nimaw? Captain lai ni pha lawisi a ni a, tha na a rawn chhuah tawh vaih chuan ṭhinrim taka ang buan buan mai chi ani abul hnaia lo awm tan chuan Savawm hliam bula awm pawh thlan awm zawk khawpa mihring hrawn hreh awm a ni, khatia a han lal tirh deuh kha chuan Israel kha a be tha viau maia, tuna Uganda Airforce te khu Israel puihna hmanga din an ni, fighter Pilot pawh a neih mûmal hma hauh khân khawvêl huap pawha Fighter tha ber ber chi neih kha a duh nghâl tlat mai a, Isrsel thlawhna sipai pâwl hotute pawh khân an mangan pui viau awm e, amah kha fing phakar mawl ru êm êm bawk si Medal tih angreng lawm zet mai kha a ni a, khawvêl huapa sipai chawmawina medal langsar chin deuh kha chu amah leh amah a inpe hmiah hmiah mai a ni, a hming Pum pawh hi tûru tham asin, "His Excellency, President for Life, Field Marshal Al Hadji Doctor Idi Amin Dada, VC, DSO, MC, CBE, Lord of All the Beasts of the Earth and Fishes of the Seas and Conqueror of the British Empire in Africa" tih a ni duah mai.
Vawikhat chu Israel rama a zin laiin, a tha na a rawn chhuak ta thut mai a, Israel sorkar chu a sawisêlin a ankhum ta chiam chiam mai a, Yumkipur Indo lai a, lsrael sipai ten, Aigupta 3rd Army an sawisak dân te chu, " mi nunrawng thil tih" tiin a ang chiam chiam mai a, chawp leh chilha Uganda rama thlawh hawn a tum ta a. Israel atanga Uganda pan tûr thlawhna thlawhlohni a lo ni leh zel si, Idi Amina ṭhinrim chuan " pawi lo, Athens-ah ka thlawk lût phawt anga chuta tang chuan Ke in Uganda chu ka pan mai ang" a han ti pek a. Greek ram Athen khawpui aṭangin Uganda chu ke ngatin han kal teh reng se engtikah tak thleng ang maw, vawikhat pawh Tanzania bom nân Phantom jet fighter 15 min han pe teh u, a han ti mai pêk a.
Khatia Israel nen an lo inhmel huat tak hnu khân USSR bawk khân khatih laia an fighter tha MiG 17 eng nge maw zat pein ṭhianah a siam zui ta kha a ni a, Mahse Entebe chhanchhuah tum khân Israel commando ten an hal chhiat sak vek a, a hnu kum hnih ni 9 October 1978 ah Tanzania sipaiin an rawn run a, Uganda mipui zîngah Idi Amin thlawp tu an awm tawh lo, sipai pawh 20,000 emaw lek a lo nei a, Uganda Leberation Army leh Tanzania sipai tangrualin Uganda chu an chhan chhuak ta a, Idi Amin pawh Saudi Arabia lamah an tlân bo ta a ni.
Dictator chu engti khawpa paukhauh leh nunrawng hlauh awm pawh ni se, mipuiin an thlawp loh chuan chhiat hun a nei tho tho ang.
No comments:
Post a Comment
I ngaih dân han thawh ve rawh le....