HRUAITU /HOTU KA TAWN VE ṬHÎNTE MIZIA

By: Tluanga Chhakchhuak

      Kum 33 chuang zet Subordinate Officer hna chelhin Mizoram sorkar aṭangin ka pension tâk hun pawh ni 100 a tling tep ta mai. Sorkar hna aṭanga han chawlh meuh chuan khawtlâng leh kohhran lama ka hun ṭha la neih zawng hi inhman ka tum ve a, kohhran lamah erawh chuan thlarau thilpêk ka dawn meuh loh avângin ka inhmang ta lêm lo. Literature, Politics leh Social Organization hrang hrangah sâwmna ka dawn avângin ka phak tâwkah ka tel ve ta nual mai.

    Chûng pâwl hrang hranga ka inhman tâkah chuan thawhpui duhawm tak tak eng emaw zât hi ka chhar thar a, ka tân khawvêl thar, ṭhian thar, hotu thar, ka neih avângin ka thawvengin nuam ka ti khawp mai a. Ka kawm phak ngai rêng rêng loh politician lâr tak tak hnung ka zui a, sorkar hna ka thawh laia kan hotu ni ṭhîn First class officer pension-te nên in ang khatin mawhphurhna kan nei a, ziakmi mi lâr tak tak leh Media khawvêla khawsa ṭhînte nên a chang changin kan inhmu ṭhîn a, ram chhûng ram pawn lama min lo ngainatute nên Zoom meeting neiin ka hun ka hmang ve ṭhîn a, ar note, a tui aṭanga keu hlim ang maiin khawvêl zimte aṭangin  khawvêl boruak zau zawkah cheng ang mai ka ni.

Sorkar hna ka thawh lai chuan hotu inkhaidiat chhawng hi ka chungah an awm teuh a, promotion step khat kan neih leh Sir kan tih tûr an tlêm deuh a, Sir min titu an pung leh deuh ta ṭhîn a. Chûng Sir /Madame tia kan koh ho hi kan hotute an ni.

    Hotu/hruaitute hi pâwl hmasâwn tûra mawhphurhna neitu an nih vângin an dinhmun a pawimawh hle ṭhîn. Department emaw, Organization emaw hian nihna leh dinhmun chelh bîk kan nei theuh a, chu dinhmun luahtu chu thuneitu dinhmunah a ding tel ṭhîn.

    Chutiang sorkara thuneitu dinhmun chelh theite chu Officer kan tih hi an ni mai a, an taimak lova, an inthlahdah viau pawhin sorkar chu a kal ngaiin a kal reng tho a, chu din hmun pawimawh luahtuin rem a hriat a, a inpêk zawh erawh chuan ramin inhnangfak nân hmangin kan chhawr êm êm a, chutiang mi an nih loh chuan ram hmasâwnnain a tawrh phah ṭhîn.

    Khawtlângah erawh chuan chhûngkua pian leh mûrnain a zir avânga thuneihna leh lalna hui thei a awm ve thei tlat thung a ni. Mi ṭhenkhat sum leh pai ngah vang leh awm theih vângin chu an neihnate zârah ram khawtlâng leh kohhranah thuneihna (Hotu nihna) an chang thei tih a hriat theih bawk a ni. Chutiang mi chu positional power nei tiin dah ila pâwl tin hian pahnih khat chu kan kawl tih a hriat theih a ni.

    Tin, chûnga kan sawi ang ni lem lo, mihring chhûngril nun leh thil tihin a siam chhuah mi dangte rilru hneh thei riau mite zah leh rawn hlawh chi khawtlâng leh pâwlho te kaihruai thiam chi mi talent nei hi an awm leh a ni. Chutiang mi chu rilru ṭha leh ngil, mi dangte hmakhaw ngaia inpe, thawhpuite phutna nei miah lo, ngaihtuahna nei leh finna/hriatna nei zau, nungchang ṭha, dikna ngaina hi an awm ṭhîn.

    Mi ṭhenkhat hruaitu leh hotu nih tumte erawh chu thuneihna neih tumin pâwn lam thiltihtheihna sum leh pai, hriamhrei chelekna an hmang fo ṭhîn. Chutiang chu tûnlaiah dictator dinhmuna awm mêkte an ni hlawm a, mite zahder leh lâwm an hlawh lem lo. Entirna atâna ṭha ber chu tûnlaia Myanmar ram buaina a a bul tumtu ber Rulputara te pâwl hotu ber Sipai Lal Min Aung Hlainga ang kha an ni.

    Hotu leh Hruaitu kan tih zawng hi mihring chhungril nun ze ṭha lo hneh a, an hruai pâwl hmasâwnna hnarkaitu ber an ni. Thuneihna leh thil tihtheihna inchuhin ram tam takah a bîkin MYANMAR ram angah pawisawi lo mipuite tual thihna thlengin thisen nasa takin a luantir mêk a, Mahni thuneihna leh ropuina humhim tumin an rapbet mêk a ni.

   Pâwlho ṭhatna leh hmasâwnna tûra mawhphurhna neitute zîngah mahni chauh hi a hlâwk thei ang bera thawka inngai leh ṭhiante thil ṭha tih ve chhûn erawh beitham leh remhre tlêm deuha inngai tlat ching pawh ka hmu ve nual a, ṭhiante thu ṭha sawi apianga lo khak ziah leh mahni thil rawt tlang loh vânga tih tauh ching hruaitute pawh an awm ve nual mai a. Khawtlâng leh ram hruaina thilah pawh hruaitu leh hotute dinhmun azirin hmasâwnna hi a lo inlen hleih a nih dâwn hi ka ti ta a.

Print this post