BBC-IN DR. SA SA AN BIANGBIAKNA

16 April 2021

Trans. Kyaw Hla

BBC: Aw le, Union Minister leh National Unity Government of Myanmar tâna an Spoke Person thar, dinhmun derthawnga a din avânga a awmna târ lan remchâng lo Dr. Sa Sa i han kawm teh ang. Chanchin thar i lo ngaihthlak avângin kan lawm e. Hei hi BBC World News a ni e. Unity Government chanchin kimchang zawkin min han hrilh hmasa la; chuan, in thil duh ber tihlawhtling tûrin  [National Unity Government of Myanmar hi] engtia din ta nge in nih le?

Dr. SS: National Unity Government hi mipui din leh mipui tâna din a ni a; ram chhûnga ethnic (tain-yin-thar) arm pâwl te, political party te, thlantlin parliament member te leh civil society pâwl zawng zawngte huama ram mipuite nunna atâna din a ni. Ṭan hona, inzawmna nghet leh inpumkhatna ṭha taka din Unity Government of Myanmar a ni. Kan Acting President chu Kachin hruaitu ṭha tak Kachin State-a mi a ni a; kan Prime Minister chu Karen State-a mi a ni. National Unity sorkar-a mi 60 % hi ethnic (tain-yin-thar) hruaitu infin khâwmte an ni a; hei hian kan hma hun min sialsak thei a ni. Kan hma hun hi sipai thu chauha rorêlna (military dictatorship) tel lova hman kan duh. Kan hma hun chu Federal Democratic Union a ni a; thawh hona chauhin chu Federal Democratic Union of Myanmar chu kan thleng thei a ni. Chuvângin, vawiinah hian mipuite duh dân leh mipuiten anmahni tân leh ram tana palai hna thawk tûr vote an thlâk tak 2020 Inthlanpui mandate ang ngeiin sorkar chak tak kan din a ni. 

BBC: Engti ang chiahin nge sipaite hnungtawlh tûra nawr in beisei le?

Dr. SS: Hma lâk dân tur kawng (road map) chiang tak kan nei tawh a. Road map 1 chu kawng hrang hranga sipai thu chauha rorêlna zawng zawng nuai bo a ni a, Road map 2 chu sipai hotute duan 2008 Danpui sût leh a ni. Road map 3 chu Federal Democratic Union of Myanmar din a ni a; Road map 4 chu mipui sorkar tundin a ni. Chuti ang chuan Myanmar ram dikna, zalênna leh Democratic Union of Myanmar tân Road map chiang tak kan sial tawh a ni.

BBC: Engti ang chiahin nge tûnah hian ram hrang hrangte thawpna (international support) a pawimawh le?

Dr. SS: Ram zalên leh Democracy ram zawng zawngten he National Unity Government of Myanmar hi an pawm a ngai. Kawng dang a awm lo. He National Unity Government chauh hi Myanmar ram chhûnga dikna leh zalênna tundin a nih theih nâna kawng awm chhun a ni. Tûnah hian sipai hotute hi rikraptu (terrorist) pâwl an ni tawh a; mi 740 chuang an that tawh. Democracy leh zalênna inthlanpui result an thup bo mai a ni lo va, Myanmar mipuite an suat mêk a; ni tin Myanmar mipui mtd. 54 te chu thlabarin an awmtir mêk a ni. Anniho chu khaw te leh khaw pui-ahte lût chhuakin mi an that a. Ram hrang hrang community-ten [sorkar thar hi] min pawm loha eng mah ti loa min thlîr chhunzawm zêl a nih chuan pum pelh theih loh tual chhûng indona râpthlâk tak a thleng ang a; mihring nun insuatna (genocide)-in a tâwp ang. 

BBC: Dr. Sa Sa, pawi ka ti, thu ka lo pawt chat lawk. Zawh ngei ngei ka duh che chu, National Unity Government din avâng hian eng ang chiahin nge nangmah leh i thawhpuite sahimna i ngaihtuah le?

Dr. SS: He thil hi kan ram mipuite tâna kan nun thapa ti kan ni. Phatsanna lian tak, thi tûra hremna (death penalty) kaihhnawih thu buai siamsak ka ni a. Man ka nih chuan, thah ka ni ang. Eng pawh chu ni se, kan mite tâna nun thap loh chu duh thlan tûr dang kan nei lo. Democracy kan mamawh a, zalênna kan mamawh a, dikna kan mamawh bawk. Zalênna, dikna leh Democracy kan neih hma loh chuan kan châwl lo ang, kan tlâwm lo ang a, kan tâwpsan hek lo ang. Ka thawhpui zawng zawngte leh National Unity Government-a hruaitu zawng zawngte hian kan ram mipuite tân kan nun kan thap a ni. 

BBC: Dr. Sa Sa, i hun min pêk avâng leh kan inbiakna avângin kan lâwm e. Hei hi BBC World News a ni.

Dr. SS: Ka lâwm e.

Print this post