𝐍𝐈 𝐋𝐈 𝐀𝐖𝐇 𝐌𝐈𝐍𝐃𝐀𝐓 𝐈𝐍𝐃𝐎𝐍𝐀

Myanmar sipai 30 dâwn lai an thi 

April 28, 2021 Nilaini 𝐌𝐲𝐚𝐧𝐦𝐚𝐫 𝐍𝐨𝐰 

By: Maroa Tahan

    Mindatah sipaiin an man ṭhalaite chhuah tûra an ngên lai mêk, April 24 zân khân inkah ṭan a ni. Pakokku leh Matupi aṭanga ṭanpui tûra lo kal sipaite chu mipui lam hian rawlrâla chein an lo lambun a ni.

    Chin State chhim lama Mindatah chuan ni 4 chhûng indona a thleng a, sipai 30 dâwn lai an thi tiin, Mindata awm mi pakhat chuan vawiin khân Myanmar Now Media a hrilh a ni.

    Inkah hmasa ber April 24 zân hian sipai 4 an thi a. A ţum hnihna chu Mindat khawpui chhûngah a ni a, mi 4 an thi leh a. An lo lambunnaah hian sipai 13 an thi leh a. Nimina an inkahnaah khân mi 10 aia tlêm lo an thi leh niin, Chinland Defense Force (CDF) pawl, Mindata ṭhalai hruaitu pakhat chuan a sawi.

    April 24, Mindat khawpui laili, dara siam Bogyok lim awmna bula sipai dodâlna lehkha ziah tar lai ţhalai campaign an mante chu chhuah tûra an ngenna aţangin sipai leh mipui inkârah inkahna hi a thleng ta a ni.

    Nimin April 27, chawhnu lam thleng khân Mindatah hian an inkâp a. Tlai lamah chuan an mi man ve vete inthleng tûrin sipai lam hian rawtna an nei ta niin Mindata CDF pawla ţhalai hruaitu pakhat chuan a sawi.

    Mindat aţanga thlang lam, mêl 30 vêla an hual chep râlthuam keng sipai 20 leh sipaiin an man Mindat ţhalai mi 7 te chu inthleng tûrin nimin tlâi khân an inrem ta a ni, tiin, inbiaknaa tel ve Mindat ţhalai hruaitu hian a sawi.

    Zân dâr 9 vêl khân an mi man ve vete chu an inthleng ta a. An haw a, sipai lam pawh Mindat khaw hnuai lamah an tawlh kîr ve bawk a ni. 

    Zânah Mindata awmte pawh an chhuak a. Keini lama ţhailai an man mi 7 pawh chhuah an ni e, tiin, CDF pawl hruaitu ţhalai chuan a sawi bawk. 

    Mindata CDF leh sipai inkahnaah hian sipai lam ţanpui tûra Pakokku leh Matupi aţanga lo kalte lambuna rawlrala an lo chêt avâng hian sipai thi an tam phah a ni. 

    April 26 khân Matupi aţanga sipai ţanpui tûra lo kal motor 3 chu, Mindat aţanga thlang lam mel 30 vêla hlaa an lo lambunnaah hian sipai 10 vêl  thiin, 20 vêl an hual bet bawk a ni. 

    April 27-ah Pakokku aţanga ţanpui tûra sipai motor 9-a lo kalte chu Mindat aţang mel 5 dâwna hlaah mipui lamin rawlrala chein an lo lambun bawk a ni. 

    April 24 khân mi 3 kah fuh an ni a. 25-ah chuan an awm lo. 26 khân mi 17 bawr vêl, thi zât erawh ka hre lo. Nimin 27 chhûn khân mi 2, tlâi lamah 1 kah fuh a ni. Mi 20 chuang kah fuh an ni. Nimin khân police thi 1 chu vui a ni. Ani hi ni 26 a kah fuh kha a ni, tiin, Mindata kawngzawh hruaitu Nwe Oo Zalat (hming lem) chuan a sawi bawk. 

    Mindata ni 4 chhûng indonaah hian sipai lamah thi leh hliam tam hle mah se, mipui lamah ve thung chuan pakhat mah an awm lo a ni. A chhan chu, an ram chhûng chanchin an hre chiang êm êm a. Tukuli silai hman an thiam êm êm bawk a. An inlungrual êm êm bawk a ni, tiin, a sawi bawk.

    Hetianga an chak chhan nia lang ta chu, sa pel ţhang an ni a, ram chin an hre chiang hle a. An thil tumah an chiang a. An inring tawk hle bawk. Lungrualnaa phuar belhbawm tlat an nih vang bawk a ni.

    

Print this post