INDIA LEH BURMA RAM INLAICHINNA

By: Tluanga Chhakchhuak

(Khawvêla democracy ram lian ber India hian Burma sipai ni ropui ber Burma Military's Day parade hmang tûrin a palai a tîr a, Myanmar CDM vânga râltlânho Mizoram ramriah an lo dan chhan pawh Vaihovin sipai sawrkâr tlawn lungawia Gas leh oil an siak duh vang a ni thei em?)

India ram Vaiho leh Burma rama Kâwlho chu hmânlai ṭuan leh mang aṭanga lo inlaichîn tawh niin an insawi ṭhîn a ni. Political, economic leh social-cultural lamah kawng engkimah tam takin an inkungkaih ṭhîn tawh reng a ni. 1993 vêl aṭang phei chuan an inkârah thawh hona a ṭha lehzual a, ruihhlo do kawngah te, ram pahnih hel beih hona leh ramri inven tawn kawngah te, sumdawn tawn kawngah te hian Military Junta sipai sorkar nên an thawh hona a ṭha hle a ni. 

Burmese-ho hi India ram aṭanga lo kal Theravada Buddhism vuantute an ni a, Vai Hindu-ho Grantha hawrawp hi tlêma siam danglamin Kâwl hawrawp atân an siam ta a, kum sâng fê hi chu Vaiho nunphung leh khawsak dân hi an lo la tawh a, sakhuana, thu leh hla, ei leh in thlengin ram pahnih te hi an inzul khawp mai.

British rorêltute kuthnuaiah rei tak ram khat anga awm hnuah kum 1937 khân Governor hran neiin ram bung hrang changin an indang ve chauh a, ram pahnih te hian independent movement a sual chhuahnaah pawh eng emaw chen chu an lo thawk tlang hman viau a ni.

Ram pahnihte chu Independent an hmuh ve ve hnuin Prime Miniter U Nu hunlai khân Parliament democracy system hmanga ro a rêl lai khân chuan an inṭhianṭha hle mai. Mahse, 1962 aṭangin  General Ne Win-a ten sipai rorêlna hmanga ram an kaihruai takah chuan India hian namên lovin demna a chhak chhuak a, Kâwlho leh Vaiho chu Burma ram chhûngah intithiam lovin an intualvuak chiam ta a. Tichuan, Burma sorkar chu khawvêlin a kawm serh ṭan ta a, an inkungkaihna pawh chu tlêmin a hlat deuh hret hret ta a. Burma ram chhûnga mipuiten pro-democracy movement an kalpui ta chu India-in a thlawp tlat avângin an inkârah China ram rawn tlazep ta a, China ram nên Burma ram chu a inhnaih ta sauh sauh ta zâwk a ni.

Prime Minister Pi Indra Gandhi hunlai leh a fapa Rajiv-a hunlaiin ram pahnih inkâr a ṭha leh hret a, PM Rajiv-a pawh Rangoon khawpuiah a va zin nghe nghe a ni. 1988 khân 8888 Uprising avângin Pro-democracy movement a lo awm leh tak avângin India ram chhûngah Burma Refugee-te chu an rawn luh leh tak avângin an inkâr boruak chu eng emaw chen chu a khi leh ta a. 

India hian hruaitu ropui hmathlir thui tak nei PM  P. V. Narasimha Rao leh Atal Bihari Vajpayee te an rawn sorkar khân foreign policy ṭha deuh duangin ram 2 inkâr inlaichîna chu tihthat/siam ṭhat an tum ta viau mai a. Nakin deuh hnuah chuan Burma ram ṭhian ṭha tak niin Burma ramin a sumdâwnpui ram zînga a thawhpui ber palina a lo ni ta a ni. 

India hian Burma ram nêna insumdawn tawn nân khawmual lam kawng, tuipui lama lawnga inkal pawhna leh thlawhna hmanga inkalpawhna zawng zawng chu hma la leh zualin Manipur state leh Kalaymyo inkâr INDO MYANMAR FRIENDSHIP ROAD tia hriat Highway ṭha tak tak te, Zokhawthar to Kalamyo (Tahan) kawngpui te, Lawngtlai to Arakan State chhûng tuifinriat lawng chawlhna hmun pawh tûr Koladyne Multi Model Purpose Transport Transit Road te chu a thlawnin a sialsak a, a ram chhûnga India mipuite chawmdawl ngaiin harsa hle mah se, Burma ram tân chuan gas leh oil laihchhuahna te, Agriculture, IT, steel, food proceeding lamah nasa takin a pui a, ram 2 insumdawn tawnna Bilateral border trade thuthlungte chu siam dunin Nagaland, Manipur, Mizoram lamah Border Trade Centre a din ta a ni.

Chu mai a la ni lo. India hmarchhaka hel-ho nuai chimit tûrin ram 2 sipaite ṭangrualin OPERATION SUNRISE Phase I &II an nei dun bawk a. Tichuan, India hmârchhaka helho tawm khâwmna hmun chu an phing darh a, Koladyne project kawng siam tithuanawptu Arakan hel pâwl pakhat China ṭanpuina dawnga khawsa Arakan Army-te chu che thei hlek lo tûrin an lo bei dun tawh a ni. Tin, India sorkar chuan Burma sorkar tâna hnawk êm êm Rohinya hel pâwl ARAKAN ROHINGYA SALVATION ARMY (ARSA) leh Muslim hel pâwl tho Aqa Mul Mujahideen leh Burma sorkar atâna hnawksakho hel pâwlte chu NE INDIA STATE helte Burma sorkarin a dopui avânga lawm thu sawi nân Burma sipai a pui a ni.

A nihna tak takah chuan India hian Arakan State chhûnga Oil leh Gas-te chu China ramin ni tin a gas pipeline hmanga chhum lo chat lova a hip luh ang kha a duh avângin tlawn chikimin a tlawn tih hai rual a ni lo ve. Chuvângin, 2013 aṭangin India chuan LOOK EAST POLICY chu thuam ṭha leh sauh sauhin Act East policy a ti thul, ASEAN ramte nên Burma ram khawmualpui kawngpuia hmangin insumdawnna siam phet a tum a ni.

India hian a ram mipui tam zawk retheihna avâng leh Covid hri lêng an vei lai pawhin nakin hnua Burma zâr a zo theih nân Burma ram hnêna kum 2013 kuma an sipai thuam chak nâna pawisa a puk tir loan pawisa US Dollars 500 million chu a ngaidam vêl a, kum 2020 December thla khân Burma-ho tuihnuai lawng neih hmasak ber tûr atân India sorkar chuan Kilo class (INS SINDHUVIR) chu thilthlawnpêk atân a hlân bawk.

Ka nau Valtea, India Navy-a lawng sipai officer ni pha ve ngatin min hrilh ruk dânin Myanmar sipaiten present anga an dawn tuinuai lawng hi Vai-hoin Russia rama an lei an hman hlui a ni a, rawngte an kap thar a, 24.12.2020 khân Christmas present atân Commander in Chief Min Aung Hlaing-a te an pe ta a. Chu tuihnuai lawng chu Burmese hming" Min Yee Thihathu" tiin sakhming thar an phuahsak ta a nih chu.

Tûn kâr chhûnga an neih tûr Bay of Bangal tuipuia Military Exercise indo lemchan an zir tûrah an laipui te chu an kap chhin ve dâwn a, a puak thei ngut dâwn emaw chu le. 

(India Vai leh Burmese Kawl kerang phakar ve ve inkâwmngeih der vêl chungchâng hi ni dangah ka la sawi leh ang.)

Print this post