SUAL SIPAI AN TLÂWM NGEI DÂWN E!

By: Tluanga Chhakchhuak

Myanmar rama (Ethnic Armed Group ) hnam hrang hrang râlthuam kenga sual sipai dodâla bei mêk leh inpuahchahte chu Burma sipai Commander-in-Chief Gen. Min Aung Hlaing-a mi leh sa ten kawng chi hrang hrangin an vehthlem mêk a ni.

Democracy tundin tum pâwl CRPH nêna lungrual taka ṭang dun thei lo tûrin  thiam taka hem thlâkin kan Zohnahthlâkte zîngah tak ngial pawh Sipaiho din State Administrative Council-ah nihna leh chanvo sâng tak tak an hlân a ni. A ṭhen chu Law adviser angin an dah a, a ṭhen chu Chin State Administrative Council chairman nihna pein State Chief Minister chanvo hial an hlân a ni. A tam zâwk chu tualchhûng rorêlna VCP nihna hlân an ni a. Chutiang nihna pawmte chu dictatorship tinghettu leh mipui phatsantute an ni. Mipuiten an tlan tlin nilo sipai firfiakho ruat a nih vângin ṭîn chhia leh bur chhia khawng riin an duh lohzia an lantîr a ni. Ethics Armed Forced-te chu NCA inkahhaina thuthlung zawm tûrin sum leh pai nên an thlem bawk.

China ram hi Burma sipai uichoho hnungah kawng chi hrang hranga fuihpawrh Burma ram leilung hauhsakna chu îtin an ram hamṭhatna thlîr rengin an lo hmanhlel ve mêk bawk a. CRPH te râltiang ram Federal Republic of United States of Myanmar ram chu Gen. Z-ten Federal Army hmanga hnehna an chang palh ang tih an hlauthawng êm êm tawh a ni. Chutiang a nih hunah chuan tlâwm chikimin an tlâwm dawn avângin a kaw tawpah an ṭang tawh a, ni tin hian sipai firfiakho ruang chu khaw tinah hlawm tûr a awm reng a, an mangang tak zet tawh a ni.

Sual sipai-ho zînga inlamlêt a mipui lam ṭang tâte chu Federal Army an zawm zêl a, chûngho zîngah chuan Army Doctor rual pawh an awm tawh. Sipai leh police-ten CDM zawmin Federal Army lamah ṭangin sual sipaiho lakah mipuite chhanhim tûrin an inbuatsaih mêk a ni.

Myanmar ram khaw tin chu CDM thlawptute chuan sipaiho dodâlna an nei reng a, chûngho tudai tûrin security force-te an indaih lo êm êm a ni. An hma chhawn tûr Ethnic Armed group-te an ngam dâwn loh avângin inkahhai an puang cherchul a, hmun tina operation nei tûr chuan an tha chakna hian a tlin ta meuh lo a ni ber mai.

Hmar zâr lam tangrual pâwl 3 chuan Federal Army-te nên tangrualin chêt lak an tum tak avângin Min Aung Hlaing-a sipai ruihhloa hrairuihte chu chaurauek an thai dâwn chauh a ni. A kaw tâwpah an ṭan tawh avângin Civil War-a an hman ngai reng reng loh jet fighter hmangin mipui chenna te thlengin an bomb alh tawh a ni. Ethics Armed Group-ten a ruala sipai sualho an do chuan hun rei lo tê chhûngin hnehna kan chang ngei ang.

UWSA an tih mai China rim nam WAH-ho chu an dinhmun an la insawi chiang lo va, China-ho kaihbu ve tho an ni ta ve ang. Federal Army hian China Communist-ho pawh hi kan hmachhawn ve tho chu a rinawm a, zamna tûr reng a awm lo a ni. Min pui tûrin French ram leh Quad ramte an awm reng tawh tih i hria ang u.

UN aṭanga Peace Keeping Force-te, R2P tih ai chuan keimahni chhûng ngeiah sual sipai do theih tûra chakna a awm tih hriain Pathian chakna ringin i pen zêl ang u.

Print this post