MYANMAR CHUNGCHÂNGA ASEAN HOTUTE INHMU KHÂWM KHA

By: Maroa Tahan 

April 25, 2021, Pathianni

𝐃𝐞𝐯𝐞𝐥𝐨𝐩𝐦𝐞𝐧𝐭 𝐌𝐞𝐝𝐢𝐚 

Myanmar ramin buaina a tawh mêk chungchâng ching fela thutlûkna pakhat nei tûrin ASEAN hotute chu Indonesia ram, Jakarta khawpuia ASEAN General Secretary Office-ah nimin Inrinni chawhnu khân an inhmu khâwm a ni. 

ASEAN hotute inhmuh khâwmnaah hian Myanmar sipai lal, Senior General Min Aung Hlaing-a pawh a tel ve. Rorêlnaah hian Myanmar ramah Democracy hmuh leh ngiata lungawi lohna lantîrtute sipaiin tharum thawha a nghaisak ṭhinna chu titâwp a, Daw Aung San Suu Kyi-i telin Politics vânga tângte leh tûn boruaka a man zawng zawngte chhuah zalên tûrin Senior General Min Aung Hlaing-a an nawr rin a ni. 

Khawvêl huapa hlauhthawnawm Covid-19 hripui lêng kârah ASEAN hotuten inhmatawna Myanmar chungchâng a sawipui hi ASEAN-in Myanmar tâna hlauhthawnna thuk tak a neih leh ramin harsatna a tawh mêkah ṭanpui a duhzia tilang chiangtu a ni, tiin, Indonesia Foreign Minister Retno Marsudi chuan Zirtâwpni khân a lo sawi tawh a. 

Myanmar ramin a tawh mêk buaina lungchhiatthlâk tak hi Myanmar, ASEAN leh helai ramte tân buaina zakhua thlen theitu a ni, tiin, Singapore Foreign Minister Vivian Balakrishnan chuan a lo sawi bawk.

ASEAN Chairman inthlâka tûna chelh mektu Brunei Prime Minister Hassanal Bolkiah pawhin Myanmar rama kal a, Daw Aung San Suu Kyi telin sipai hotu lûte nên inhmuh khâwmna buatsaih thei tûrin, rorêlnaah hian rawtna ka thlen ang, tia a sawi chu ASEAN palai pakhat hming thupin AP News Agency a lo hriattîr tawh bawk.

ASEAN hotu zawng zawngte hian Senior General Min Aung Hlaing-a nêna inhmuh hi rem tivek mah se, rorêlna inkhâwmah hian hminghmerha sawi lang erawh an awm lo, niin, ASEAN palai pakhat chuan a sawi. Rorêl inkhâwmah hian Thailand Prime Minister Prayut Chan-o-cha leh Philippines President Rodrigo Duterte te chu an tel ve lo a ni. 

Senior General Min Aung Hlaing-an ASEAN hotute a hmu hi Myanmar-a thuneihna a lâk leh tharum thawh chhunzawm tûra Myanmar sipai chu dân anga hriatpuina a ni e, tiin, rorêl inkhâwm lo thlîrtute chuan an hmu a ni. 

Myanmar ramah sipaiin thuneihna a lâk February thla aṭanga April 24 thleng hian sipai kut tuara thi mipui zîngah mi 750 dâwn lai an awm tawh a ni.

Print this post