ASEAN SUMMIT THUCHHUAH BIHCHIANA

By: Tluanga Chhakchhuak

(Federal democracy ram dinna tûr hun khawhraltir tumna thuchhuah mai mai a ni.)

Burma Sipai Council sorkar hotu Sr. General Min Aung Hlaing-a telna nimin (24th April ) chhûn dâr 1:30 pm a nei zawh tâk Indonesia ram Jakarta khawpuia ASEAN SUMMIT-ah chu a bîk takin Myanmar politics ngaihventute bengkhawn a hlawh hle mai.

Myanmar rambuai chungchâng (Myanmar Crisis) sawi ho tûr a nih vângin Mizorama chanchin thar ngaihventute chuan eng thuchhuah tak rawn lek chhuak ang maw tiin News Agencies-te thupuan an bih ngun hle.

Myanmar ram sipai sorkar hotu Senior Gen. Min Aung Hlaing-a chu Myanmar ram chhuahsanaI ndonesia ram leilung a rawn rah hun hun-ah lo man chat a, lo handcuff nghâl tûrin Global Centre of R2P Director chuan a naute thupêk a lo chhuah tawh avângin tûn tum ASEAN SUMMIT chu mite ngaihven a hlawh lehzual a ni.

Drone remote control sniper hmangin mi ram sipai dictator an kâp hlum ang khân an lo phil ve mai ang tiin phur takin a thih thu hriat tumin mipuiten an ring an lo tifan bawk a ni. Kan rin loh angin sipai lal Min Aung Hlaing-a chu Indonesia ram hi Russia Secret Security Agency venhimna zârah tluang takin a thleng thei a, Democracy duhtu leh sipai sorkar duhlohtuten Ming Aung Hlaing-a mithmuh ngeiin maksak tak takin an lungawilohna an lo lantir ve bawk a. ASEAN ram dang hruaitute chu an ram flag phe hlawp hlawp târin meeting neihna hmun chu an rawn pan khâwm laiin sual sipai lalpa chuanna motor erawh chu eng flag mah an tarsak ve lo va. A hnua kan lo hriat dân chuan General Min Aung Hlaing-a hi ram khat hruaitu (Head of state) ang ni lovin sipai hotu (Head of Military ) angin an lo dawng sawng zâwk a ni.

Tlâi lamah chuan lehlângin meeting a rawn hman avângin a thlâwk hawng ve ta nghâl a, a ekna ngaiah chuan a lêt leh ta a. ASEAN summit thuchhuah inṭawm pawh chu hetiangin târ lan a ni ta a ni.

FIVE POINTS OF CONSENSUS.

On the situation in Myanmar, the leaders reach consensus on the following.

●First, these shall be immediate cessation of violence in Myanmar and all parties shall exercise almost restraint.

●Second, constructive dialogue among all parties consumed shall commence to seek a peacefully solution in the interest of the people.

●Third, a special envoy of the ASEAN chair shall facilitate mediation of the dialogue process with the assistance of the secretary General of ASEAN.

● Forth, ASEAN provide humanitarian assistance through the AHA Centre.

● Fifth, the special envoy and delegation shall visit Myanmar to meet with all parties concerned.

Nimina Special summit an koh chhan hi an member ram Myanmar buaina namên lova tâwk, chin fel dân kawng ngaihtuah ho tûra koh a nih vângin a chhûnga thutlûkna hi an siam ta chu a ni a. ASEAM ram motto One Vision, One Identity, One Community tih angin hma an la turah ngai ila. Mahse, an thuchhuah aṭang chuan kan beisei a pha lo hle tih a hriat theih a ni.

■■An thuchhuah hi engteh ual a nih a rin awm lo va, Sipai sorkarin tharum thawhna bânsan tûra an nawrna-ah chutianga an bânsan loh chuan chutiang khatiang angin an chungah thununna lekkawh a ni ang tih a tel reng reng lo a ni.

■■A pawimawh ber chu dân lova thuneihna an chhuhsak hnua an hren zui tâk ram hruaitute leh politics kaihhnawih vanga lung in tângte chu chhuah zalên ni rawh se tih hi an ziak lang reng reng lo.

ASEAN ram hian tu ram buaina mah hi an chin felsak kan la hre ngai lo a ni. China hian NUG hma lâkna tiṭhuanawp zawngin sum leh pai, râlthuam hmanga a puih ṭhîn ASEAN pâwl hmangin a thluak a vai vir vêl ni berin ka hria a ni. Sipai Council sorkar hotu Sr. Gen.Min Aung Hlaing-a meetinga tel tûra an sâwm ringawt pawh ram pakhat Lalah an pawm tih an tilang chiang tawh a ni. 

ASEAN-ah hian ASEAN PLUS THREE an tih mai ASEAN DIALOGUE PARTNER an tih mai zîngah China ram hi a tel ve a, Myanmar sipai lal lamtang Myanmar leilung hausakna sipai nêna tangruala thuau sawk duhtu China hian UNSC-a Myanmar ram chungchâng UN leh international Community-te hma lâkna reng rengah a veto power hmangin vawi tam tak a hnâwlsak zêl a. Tûn ṭum pawh sum tam tham tak rulhsen loh khawpa leibatu Indonesia ram chhûngah a zârzoten meeting a nei chu a ni a. Myanmar sipai sorkar lam chhiat theihna khawp rorêlna thuchhuak hmuh tûr a awm lo a ni. Inremna dawhkan kil hova thawk tlang tûra Sipai sorkar leh mipui sorkar a nawrna hi Democracy Federal ram thar lo ni tûr tih khawtlai tumna mai a ni.

ASEAN ho thuchhuah han zir chian hian tharum thawhna tih ṭawngkam an hman hi sipaiho deuh chauh sawina a kawk meuh lo va, mipui lam pawh a rawn huam tel ni ta in a lang thei a ni. Dik lo taka Sipaiten an duh duh an man khâwm ho chhuah vat tûra nawrna pakhat mah an thuchhuahah hian a awm lo bawk.

Democracy ram tungding vat tûrin añ nawr lo bawk. Tin, 2020 inthlanpuia mipui a thlantlinte chungchâng eng mah an sawi tel duh lo.ASEAN convoy leh palai ruat bik chauh kaltîr tûra ziah lan hi khawthlang sorkar dang rawn chêtna tûr dan tumna mai mai a ni. UN palai leh Human rights lam pâwlte luh theihna phalsak tûrin an nawr duh chuang si lo va. China duh dân ang chiahin thuchhuah an siam an siam a ang mah a ni.

Humanitarian aid chunchang phei hi chu mipuiten zârzo phâk loh tûr sipai kut chhûnga lût vek tûr ṭanpuina a ni dâwn si a, an lâwm zâwng tak a ni zawk ang . USA, EU leh UN hruaitute in moral support pein NUG sorkar chu an thlawp a, China leh Russia chuan SAC an thlawp tih lang lo lam aṭangin a hriat theih reng a ni. 

Engpawhnise, Democracy tundin kawngah mahni mawhphurhna ṭheuh hre rengin harsatna eng pawh tawrh huamin Revolution a hlawhtlin hma loh chu hnungtawlh lovin hma i la chhunzawm zêl ang u.

Print this post