MIZO NULA TLANGVÂLTE TLÂWMNGAIHNA

By: Tka Zote Thankhuma

Tûn hma Mizo tlâwmngaihna dik tak ang kha tûnlai hian a awm ta lo ni lovin kan nunphung lo danglam ta leh kan lo changkan zêlna hian tlâwmngaih a ṭûlna thil tam tak kha a lo um bo ta zêl zawk ani.

ZUALKO:

Mizote hi thingtlâng Lo neia ei zawng kumkhua kan ni ṭhîn a, hna thawh tul vânglai tak tak chuan nula tlangvâl leh hna thawk thei chin rêng rêng chu an feh deuh vek ṭhîn, mahni, mahni thawhchhuah ringa khawsa an nih ṭhîn avângin ni khat tê pawh an awl phal ngai lo, Khua hi a reh ruih mai ṭhîn. Mitthi an awm palh chuan nula tlangvâl, nuleh pa, leh a thei apiang an tlân khâwm nghâl a, mitthi in singsak ṭûl apiang an singsa nghâl sung sung a. Nulain tui an chawi a, khualkhua aṭanga laina lo thleng tûrte tân leh khawhar chhûngte tân ei rawng an bâwl nghâl a, hetiangah hian ruahmanna han siam zung zung tûrin Va Upa an pawimawh ṭhîn êm êm a, tûnlai  thleng hian thingtlâng lam khaw tam tak chuan val upa hi an la nei a ni.

Tûnlai angin inbiakpawhna ṭha Phone te a la awm si lo, mitthi chhûngkhat laina khualkhua (khaw thenawm a ni deuh ber) a nupui pasal nei emaw, laina hnai an lo awm ngei ngei bawk ṭhîn a, chûng mite chu chhûn leh zân, ruahsur kârah pawh nise hrilh hriat an lo ṭûl ta ṭhîn si a, Vâl Upa chuan "Hei le, Chumi khami khuaah chuan chumi khami te chu hriattîr an ṭûl tlat mai a, tlangvâl tlâwmngai thei kan awm em? tiin tlangvâl zîngah a ruk deuh hian a han than kual a, tlangvâl tam tak zân thim leh ruahsur kârah pawh nise an inpe ṭhîn. 

Khaw khat mai nilo khaw hnih khaw thumah kal a ṭûl deuh ngei ngei bawk a. Chûngah pawh chuan khaw hla deuh leh kal kawng hreawm deuha kal nih an la inchuh nak nak zêl. An kal tumna khua an va thlen hunah pawh thu khuh tak hian "hei le kan khuaa in nau, in ni, inpi in chumi khami chuan min peihlohsan ta tlat mai a, kan rawn hriattîr che u a ni e" tiin, a theih hrâm chuan an mi va kohte nên khân mitthi awmna khaw lamah an kîr ho leh ta ṭhîn a ni. Hêng hi thil namai a ni hauh lo, tûn hma chuan kawlphekhawnvar te hi tlangvâl zawng zawngin an nei ngai lo va, meichher chhit a ni tlângpui a, ruahsur hnuaiah pawh kal a ṭûl tho ṭhîn si a, ṭhrelrêtpuan emaw, nihliap neih loh chhuanlam rêng rêng an sawi ri ngai lo.

    Hetianga tûn hma Mizo tlâwmngaihna hautak zet mai kha tûnlaiah chuan kan changkanna hian min rawn chhawk zangkhai ta vek mai a ni, awmhmun aṭangin  kan va hrilh thei a ni satliah mai lo, thlalak Video nên lam kan inthawn tawn ta zung zung mai a nih hi. MIZO TLÂWMNGAIHNA A CHUAI TA TIHNA A NI RÊNG RÊNG LO. 

KHAWHAR IN RIAH:

    Tûn hma leh tûnlai thleng hian thingtlâng lamah chuan an la ching zêla khawhar In riah hi a chhan dik tak ngaihtuah chuan thil ṭha tak a ni, mitthi an awm chuan tlangvâlin puanthuah khaiin khawhar ln an pan a, an riahpui ṭhîn. An va riahpui satliah ngawt lova khawhar chhûngte hna ṭûl apiang hlothlawh, thingeh, tuichawi leh a ṭûl apiang bâkah ln thâwmṭhat thlengin tlangvâlten an thawhsak ṭhîn. Tûnlai hian khawpuiah phei chuan hêng thil tam tak hi, tih a lo ṭûl tawh lo va, kan lo changkang ta a tin ni. Mizo tlâwmngaihna kha a bo ta tihna a ni chuang lo.

KANG ṬHELH:

    Hemi thu ah bîk hi chuan tûnlai thlenga Vâl upa in an la uap Ngopa khua khi pholêngah han hmang ta ila Ngopa hi khawpui ve tak ni tawh mah se, tûnlai thleng khian Lo neih an la uar êm êm a, ram kâng pawh a la pawi bîk hle, ram kâng hnu ( kangfim) ah hian Buh a tha thei miahlo va, hei vang hian kâng thelh chungchâng bîkah chuan tlâwmngaihna a la sâng êm êm a, tûna an vâl upa senior khi kum 80 a chuang tawh a ni a, ramhnuaiah kâng ṭhelhin a la tlaivâr zak zak thei a ni.    

    Ram kâng a awm tawh phawt chuan tu hâl nge? Engtia rawn kâng nge? an ngaihtuah lo, Vâl upa leh a râlrêl puite an han inhmu khâwm phawt a, khawi aṭangin nge a rawn kan ṭan, khawilaiah nge lo dan chi ni ang, chulai khalai mualah chuan tlangvâl 50 in mei lam (mei kawng) sial/phiat in tan lo khawh phawt se, lo hal khalh rawh se, emaw, mual piah zawk a kangkai tûr saw tlangvâl 100 in lo veng bawk se, saw lai mual saw chu hnim ro a chhah lutuk lo bawk a, mei kawng sial kher lo pawhin kan vaw mit thei ang, tih ang reng vêlin ro an han rêl zung zung a, Information mike ah emaw Tlangvâl zawng zawng kang thelh tûr tiin an han puang ta a, tlangvâl mai bâkah pavalai, khua a awm zawng zawng an chhuak ta zung zung a, kawtchhuahah Vâl upaten a ṭûl angin hna an lo sem zung zung a, tûnlai thleng hian engti khawpa ram kang nasa pawh ni se, Ngopa tlangvâlte hian thelh theih loh an la nei ngai miah lo nia.    

    Sawi tak angin tûn hma leh tûnlai thleng khian Ngopa ah khian tlâwmngaihna a la sâng êm êm mai a. Kum tin Lo nei ṭhîn an ni a, Lo an han hal Khan mei chhuah palh a awm ṭhîn, chûng mei chhuak chuan kum leh Lo tûr a kan chhiat loh nân Nula tlangvâlten theihtâwpin ram kang an ṭhelh ṭhîn a ni.

THAWNTHU HLUI CHUL THEI LO NGOPA TLANGVÂL FUIH HARH ṬHÎNTU CHU.

    1948 March thlaah khân Ngopa Lo hal chuan mei an chhuah ta purh mai a, khua a ro êm êm mai si a, petrol kang ang mai hian a kang ta hum hum mai a, Berhtlang (Ngopa i zin ve hlauh a nih chuan pi Hauziki Gas station awmna tak hi Berhtlang chu a ni e) aṭang a rawn kang ṭan chu Tuiaivawmah Ngopa nula tlangvâlte chuan lo dan an han tuma tihngaihna thlawt a awm lo, tûn tuma Lunglei ram kang ang mai hian thinglerah te chuan meialh a inhlap sen chho zuai zuai mai a, thensen kung hung sâng pui puite chu a kang zit puat puat a, meikawng sialin an han phiat fai char char a, mahse chunglamah mei alh a inhlap kai hlup hlup zêl a, tihngaihna a awm lo a ni, Tuiaivawm chhak Mualnuam hrulah chiah hian Chhawrtuineihlala leh Tuanpuii te thawnthu a kan hmuh Tuila lui, lian deuh zawk a luang a.

    Tlangvâlte chu Tuila ah chuan ṭanhmun siam tûrin an tawlh liam ta a, lui lian zawk a ni bawk a, lo dan chah theih pawh an inbei sei hle, Tuila lui kangchat ruam maiah chuan hnahthel a tlakhat so luk mai a, chûngte chu an phiat fai vek a, hetah hian lo vuak mih vek an beisei hle a ni, Tuila lui chu, a kuang chhûnga hnahthel bâkah a kam tuak zawng zawng an phiatfai vek bawk a, ṭan an lo khawh ta a ni. Mahse, he 1948, March thla khaw ro lum huam mai chuan zah angai lo kher mai, Mualnuam pangah chuan meialh chu a rawn inhlap sen thla zuai zuai mai a, lei lam chu lo vawmit thei mah se, chung lam sâng lutuk then hung lian tak tak leh Thril kung kum 10 leng leng rawn alh zuaih zuaih maite chu tlangvâl tân pawh a rap awm duh kher mai, thing ler sâng tak tak te chu a rawn alh inhlap thla zuai ziai mai si a, thelh rual a ni leh ta lo. Ngopa ram neih that Vakawlchuan a kangkai ta. Sailo lal Hrangchuana fapa Lalzidinga leh a upa te pawh an mangang ta takzet, Vakawlchuan a kan zawh hunah Tualbung ram a kang kai ang a, Ngopa chuan Lo ram theh tûr an nei dâwn lo ṭâmpui mitthi an tâwk ngei dâwn hian an hre ta a ni. lal meuh pawhin a farnu Lalrengi (Kamthangi nu Electric Veng?) meuh pawh kang thelh tûrin a tir liam ta, Pukpui lui chhuah ah Nula ten Tlangval kangthelh rilṭâm tân chaw an chhum ta vut vut mai a, hemi hma hian, Val Upa Khawvelthanga leh a hote chuan Tualbung ram a kan kai loh nân Pukpui lui hnar khuaihnuai kaiah ṭanhmun an lo han la hlawm tawh a, Chaw pawh Chhuanruk (nithum) ngawt an nghei tawh, Pukpui lui chhuaha nulaten chaw an chhum lah chu a zuk hla tham tawh si. Rilṭâmin an chau chhia hi a ni tawh ber mai a.

    Hêng hun lai hian Ngopa aṭanga km 4 a hla Tualbung-ah Val upa Darchhunga hovin khawper tlêmte ln 20 emaw lek hi an awm a, Tualbung aṭang chuan Val Upa Darchhunga chuan khuaihnuai kai chu a pan thla ve ta a ni. Ngopa tlangvâl rilṭâm chau tawh chu an lo ṭhungawi nghuai tawh mai a, rilṭâm nên zân thum lai tlaivar tawh bawk si tân chuan tha zat a awm thei tawh lo.

    Darchhunga (Upa Darchhunga Luahloh lungdi hla phuahtu ni bawk) chuan E KHAI IN CHAU TAWH AWM HLE MAI MAW? a han ti hmasa te te a, tu mah han chhâng peih pawh an awm tawh lo, a han ngawi leh deuh vang vang a, "Ngopa tlangvâlte hian kang thelh theih loh kan la nei ngai hlei nem" tihpah chuan meialh inhlap sen zuai zuai maiah chuan a zuang lutin, meialh chu hnahchhawlin a hlap ta pawp pawp mai a, Val upa Khawvelthanga hote tân pawh rilṭâm mutchuak leh hah, sawi theih a ni ta lo, meialh sen zuai zuai kârah chuan an zuang lût ve ta phawk phawk mai a, a kang bak Thenhung lian tak tak chu an kit thlu ta zawih zawih mai a, Darchhunga lah chuan a kang nasa lai apiang mai chu a bawh phei zêl mai si a, tlangvâl tân hnungtawlh thiang a ni ta lo, rilṭâm zawi êm êma an lo awm tawh hnu pawh chuan thahrui an lo la nei ngang mai tih an hre chiang kher mai, an han tang zui ta tak tak mai a, ram kang meialh sen zuai zuai mai chu an vawmit ta duak mai a a ni. 

    Ngopa lal leh upate pawh an lâwm ngang a niang helai khuaihnuai kaia riak ho, Vâl upa khawvêlthanga hote zînga mi, tlangvâl 15 te chu tlâwmngai NOPUI an dawmtîr ta hial mai a ni. MIZO TLÂWMNGAIHNA VUL RENG RAWH SE.

Print this post